Чайаачылары пӧзiк, хуйахтары пик

Тоғазығ. Пу кӱннерде «Ӱлгер» паза «Кӱн сузы» ансамбльларның артисттерi Хакасия пазы Валентин Коноваловнаң тоғасханнар

Сiлкер айында В.Г.Чаптыковтың адынаң Хакас национальнай филармонияның саблығ ансамбльлары «Улуғ гастрольлар» федеральнай программаҷа Луганск Чон Республиказынзар паза Донецк Чон Республиказынзар «Алтын Кӧӧк» хай-балеттi ал чӧргеннер. Чайаачыларыбыс ыраххы чорых хайди салылғаннаңар регион устағҷызынаң ӱлес­кеннер.

– Аарлығ арғыстар, сiрер кирек­сiнiснең тузаланчатхан, нандырығлығ чорыхтаң айландыңар. Андағ оңдайнаң Хакасияның, ЛНР-ның паза ДНР-ның аразындағы культура палғалызын тыыдып, улуғ хозым ағылчазар. Пу гастрольлар фронтха паза тылға кӱс пиргеннер. Тархындағы сабығлар тузында культура паза искусство чоннарны пiрiктiрче, хада-пiрге тудынарға хығырча паза таңдағы кӱнге iзенiс пирче. Нанҷылар, пӧзiк чайаа­чы устарың паза махачыланыстарың ӱчӱн улуғ алғызым читiрчем. Сiрер пiстiң республиканың пик хылыхтығ сын илҷiлерi полчазар. Хакасия сiрер­ге поғдархапча. Мыннаң мындар чидiг­лерiң уламох пӧзiк ползын, кӧрiг­ҷiлер тоғыстарыңа iдӧк ле ӧкерсiнзiннер, хайхазыннар. Сiрер пiстiң рес­публиканы, хазнаны ӧңнендiрчезер, кӧдiре алчазар, – тоғазығны чылығ сӧс­тернең асхан Валентин Коновалов.

Хакасияның культура министрi Светлана Окольникова iдӧк алғыстас­тарға хозылған. Аның таниинаң, Хакасияның чайаачы ӧмелерi Россиязар нандыра айландырылған регионнарзар удаа чӧрчелер. Пӱӱл «Кӱн сузы» паза «Ӱлгер» ансамбльлар танығлығ чорыхха пар килгеннер.

– Пiс тың пичелленгебiс, чара чачырастардаң хорғыс полған. Делегацияның устағҷызы, пiстiң филармония директорының орынҷызы Валентина Ивановна Лебедеванаң ӱзiгi чох палғалыс тутхам. Ӧмелерiбiстi Россия­ның наа регионнарынаң палғалыс тударынҷа Хакасия правительствозының кiзiзi Леонид Григорьевич Лапин удурлаан. Артисттерiбic хай-балеттi кӧзiт пирген соонаң ДНР-ның культура министрi Михаил Васильевич Желтяков филармонияның адына алғыс­тас пiчиин ызыбысхан. Чоохтирға кирек, хакас ӧмелерге тиксi тилекей поғдархапча. Олар «Алтын Кӧӧктi» Франциядағы Канны городта, Италиядағы Венеция, Бари городтарда кӧзiткеннер. Артисттерге пӧзiк устары ӱчӱн алғыс. Хакасияның правительствозына iдӧк улуғ алғызым читiрчем. Пу аар тустарда ӧмелерiбiстi хайраллапчазар, ыраххы чорыхтарға чӧрер­ оңдай пирчезер. Чайаачыларыбысты хакас культуразын аннаң андар кӧдiре аларға, саблирға хығырчам, – теен культура министрi Светлана Анатольевна.

Леонид Лапин iдӧк артисттерге алғызын читiрген. Хай-балеттi кӧрген кiзiлер ағаа чылығ сӧстер читiрерге кӧп хати сығдыраттырлар, Хакасия­ның ансамбльлары хатабох килзелер, чуртағҷыларға азынада искiрерге сурынтырлар. Че Россиязар нандыра айландырылған регионнарда хорғыстар сығыс килчеткеннеңер, кӧрiгҷiлернi залларда толдыра чыырға тiдiнминчелер. 

Хакасияның чон артизi, Хакасия искусствозының саблығ деятельi, «Ӱлгер» ансамбльның хоос устағҷызы Кучен Ай Чарых Сайын республика пазына, «Улуғ гастрольлар» федеральнай программада аралазарға чахсы хабасхан ӱчӱн, алғызын читiрген паза ӧмедегi артисттернең таныс­тырған, полғанының на чайаачы чидиин алынҷа таныхтаан.

– Пiске ӧнетiн чаа операциязы парчатхан чирлерҷе уғаа сиргек чӧрерге килiскен. Пастап Москваға теере самолёттығ учуххабыс. Аннаң андар чолыбыс поездтiг узарадылған. Лугансксар автобустығ читкебiс. Анда пiстi маңат удурлааннар, аалҷылар туразы истiг полған. Пiр хараа хонып алып, Червонопартизансксар парғабыс. Ол аал чаалазығлар парчатхан орыннаң ырах нимес, отысча километр полар, неке, аннаңар кӧрiгҷiлерге залға толдыра чыылызарға чарадылбаан. Андағ даа полза, 200 азыра кiзее «Алтын Кӧӧк» хай-балеттi кӧзiт пиргебiс. Анаң Лугансксар айланғабыс. Пазох аалҷылар туразында хонып алып, Донецксер паза Новоазовсксар парғабыс. Новоазовск город Азовскай талай хазында орныхча. Пiстiң ооллар паза хыстар андар сомға суурынарға чӧргеннер. Таныхтирға сағынчам, чолларны уғаа маңат ит салғаннар. Пiрее чирлерде чаалазығлар парчатханы пiлдiрче. Пiстiң ырҷылар паза теелбекчiлер пiр дее чочынмааннар. Ниме дее полза, олар, пiр дее хорыхпин, пiр дее чазынмин, тоғыстарын пӧзiк синде толдыр­ғаннар. Кӧрiгҷiлер прай чирде чахсы удурлааннар. Оларға аар даа полза, кӧңнiлерiн тӱзiрбинчелер, пiске полызарға кӱстенгеннер, – чоохтаан Кучен Ай Чарых Сайын.