Хакас филармониязының директоры Вячеслав Инкижеков Асхыс аймаандағы культура управлениезi устағҷызы Артур Мамышевке алғыстастығ пiчiк читірче

Пресс-конференция. Киҷее Хакасияның креатив индустриялары школазында «Матырлар хазназы. Тӧлдең тӧлге» проекттiң салтарлары идiлген.

Хакасияда «Матырлар хазназы. Тӧлдең тӧлге» фестиваль алғым ирттi. Аны Ағбан, Сая­ногорск городтарның паза Алтай, Асхыс, Шира, Пии ай­мах­тарның чуртағҷылары тикке кӧ­рiп алғаннар. Наа проект пӱӱл хан­дых айының пастағы кӱнiнең сы­ғара Президенттiң культура пас­тағ­лары фонды хабазиинаң чуртасха кирiлген. Пiстiң регионда аны Хакасия­ның кӧг искусствозына хабасчаң паза тилiтчең фонды, грант утып, тӧс­теен. Ӧӧн парт­нёр В.Г.Чаптыков­тың адынаң Хакас филармониязы пол­ған.

Проектке М.Ю.Лермонтовтың адынаң Орыс академическай театрның паза А.М.Топановтың адынаң Хакас драма театрының артисттерi хозылғаннар. Филармонияның паза театрларның артисттерi, Илбек Чиңicтiң 80 чылына чарыдып, Леонид Утёсовтың репертуарынаң алылған «Эти песни вели нас к Победе» паза «Всё, что смогли» программаларны чуртағҷыларға кӧзiткеннер. Олар Геннадий Сысолятиннiң, Михаил Кильчичаковтың паза пасха даа поэттернiң чаа чылларына чарыдылған кибелiстерiн паза чааҷыларның пiчiктерiн хығырғаннар, сарыннар сарнааннар. Артисттер программаларны город-аймахтарҷа ал чӧргеннер. Республиканың чуртағҷылары, ӧӧнiнде чииттер, кiчiг чир-суубыстың тархынынаңар хоза пiлiстер алып алғаннар.

Чир-суубыстың хумартхызын хайраллапчатхан проектке рес­пуб­ликаның Л.Р.Кызласовтың ады­наң ӧӧн музейi хозылған. Аның то­ғын­ҷылары, тузалығ кӧзiдiг тӧстеп, Илбек Ада чаада араласхан саблығ чир-суғҷыларыбыс Катя Перекрещенкодаңар, Михаил Кильчичаков­таңар, Василий Угужаковтаңар паза пасха даа матырлардаңар чоох­таан­нар.

Ағаа хоза, Хакасияның креатив индустриялары школазында ӧнетiн чаа операциязы араласчыларынаң тоғазығлар ирткеннер. Олғаннар паза чииттер ЛНР-ның саблығ артизi, Лугансктағы филармонияның ыр­ҷызы Сергей Чуйковнаң, «Матырлар тузы» программаның араласчылары Василий Талановнаң, Игорь Арчимаевнең паза Евгений Воронковнаң танызып алғаннар.

– Пӱӱл пiстiң хазна Илбек Чи­ңiс­тiң 80 чылын таныхтады, ан­на­ңар чыл тооза ағаа аймах меро­прия­тиелер, чайаачы иирлер, кӧ­зi­дiглер чарыдылғаннар. Филармонияның ар­тисттерi «Эти песни вели нас к Победе» чапсых программаны чур­тағҷыларға кӧзiткеннер. Азых ачыхтарда кӧрiгҷiлер илееде чыы­лыс­ханнар. Наңмыр чағза даа, олар, зонттар алтында турып, чаа сарын­нарын хынып искеннер, iзiг айа сапханнар. Чайғызын Ағбан­да­ғы Чи­ңiс паркында иртчеткен «Тынағ кӱннiң бульвары» проектте арала­зып, iдӧк концерт кӧзiткебic. Пии аалдағы чуртағҷылар «Эти песни вели нас к Победе» программаны уғаа чылығ удурлааннар, анзы минiң хайиимны тартхан паза чӱ­реем­нi тибiреткен.

«Всё, что смогли» программа махалығ килiс парған. Филармония­ның режиссёры Юлия Моргачёва ағаа ӱс ай азынада тимненген. Хакасияның iкi театры пiске чахсы хабасхан. Республиканың ӧӧн музейi позының чыындызында хайраллалчатхан пiчiктернең ӱлескен. Прай нанҷыларыбысха проектте аралазарға ӱндескен ӱчӱн улуғ алғызым читiрчем, – теен филармонияның ­хоос устағҷызы Артур Марлужоков.   

Хакасияның креатив индустрия­лары школазында, «Матырлар хазназы. Тӧлдең тӧлге» проекттiң салтарларын идiп, ӧткiн араласчыларға алғыстастығ пiчiктер читiрiлгеннер.

Пу проект «Хакасия» газетада чардыхти узарадылар. Республика­ның полған на чуртағҷызы, газетаның сайтынзар кiрiп, Илбек Ада чаада, кизек чаалазығларда алай ӧнетiн чаа операциязында араласхан матыр туғанынаңар чоохтап пирер оңдайлығ.