Хакасияның пайрамына – опера ырлары

Пресс-конференция. Пӱӱн 19.30 часта Ағбандағы Пастағы май ачығында «Оперные горизонты Хакасии» Гала-концерт полар. Ол пiстiң республиканың 35 чылына чарыдылча.

Хакасияда «Оперные горизонты Хакасии» культура проектi ал­ғым тоғынча. Ол хандых айының 24-ҷi кӱнiнде Асхыс аймаандағы Казанов аалның азых тигiр алтындағы музейін­де азылған. Анда Хакасияның чон артисттерi Артур Марлужоков паза Мария Янгулова, iдӧк Хакасияның саблығ артизi Даниил Тарасов филармонияның симфоническай оркестрiнең хада сiлiг концерт кӧзiткеннер. Пӱӱн, от айының 3-ҷi кӱнiнде, Хакасияның тӧреен кӱнiнде, пу проект хоостыра тилекейнiң илбек ырҷылары чон алнынзар сығарлар. Iдӧк ӱртӱн айында «Оперные горизонты Хакасии» проекттiң араласчылары регионның аймахтарынҷа чӧрерлер.

– Пӱӱл Хакасияа пайрамнығ 35 чыл толча, аннаңар кӧрiк айынаң сығара аймах танығлығ мероприятиелер иртiрчебiс. «Кострома» национальнай балет, республикаҷа чӧрiп, чапсых концерттер кӧзiт парыбысхан. Iдӧк Москвадағы Хоос академическай театр махалығ спектакльлар ағылған. Тун пайрамны Хакасияның 35 чылына чарыдып иртiргебiс. Республика кӱнiне чуртағҷыларға операны сыйлиры кибiрге кiр парған. Опера произведениелерiн улуғ таланттығ ла кiзiлер толдыр полчалар, аннаңар аны прайзы истiп аларға сағынча. Пӱӱн Ағбандағы Пастағы май ачығында iкi муң кiзi опера ырҷыларының хайхастығ ӱннерiне ӧкерсiнiп алар.

«Оперные горизонты Хакасии» проекттi чуртасха кирер ӱчӱн, Хакасияның культура министерствозы паза респуб­ликаның филармониязы улуғ тоғыс апарғаннар. Пеер ӱс гранттың ахчазы кiрче. Пiске Президенттiң культура пас­тағлары чыындызы, РОСКОНЦЕРТ, «Бентонит Хакасии» компания, Мельниченконың фонды, Москваның филармониязы чахсы полыс пиргеннер. Мындағ ынағ ӧменең хада-пiрге тоғынып, Хакас Республиканың тӧреен кӱнiн таныхтапчабыс, – искiрген регионның культура министрi Светлана Анатольевна.

Пастағы май ачығында чонның алнынзар сығарлар: Россияның саблығ артизi, Мариинскай театрның ырҷызы Татьяна Павловская, Мариинскай театрның ырҷызы Юлия Маточкина, Сербияның национальнай театрының ырҷызы Желько Андрич, Новая опера театрның ырҷызы Георгий Васильев, «Геликон-опера» Кӧг театрының ырҷызы Лидия Светозарова, Хызылчардағы опера паза балет театрының артизi Александра Черпакова паза Татьяна Павловскаяның ӱгренҷiзi Юлия Кучеренко. Концертте Россияның саблығ музыковедi, кӧг критигi Елена Истратова аралазар. Чайаачы иирнi В.Г.Чап­тыковтың адынаң Хакас филармониязының симфоническай оркестрi чазир. Аннаң Хакасияның чон артизi, Хакасия искусствозының саблығ деятельi Вячеслав Инкижеков устапча.

Концерттiң программазынзар опера классиказының саблығ произведениелерi кирiлгеннер. Хакас филармониязының директоры, симфоническай оркестрнiң дирижёры Вячеслав Инкижеков паза «Оперные горизонты Хакасии» проекттiң устағҷызы Артур Марлужоков, программаны пӱдiрчеткенде, чуртағҷылар испеен сарыннарны таллааннар. Анна­ңар кӧбiзi операны наа саринаң истiп алар. Репертуарда iдӧк оперетталар, ариялар, дуэттер поларлар. Хайди даа орыс кӧглер чайылар, оларның санында Н.А.Римский-Корсаковтың, П.И.Чайковскийнiң паза пасха даа саблығ композиторларның тоғыстары. Москвадаң килген аалҷы Даниил Коган, скрипканаң ойнап, кееркестiг кӧглернең чапсыдар.

– Мин Хакас Республиканың чуртағҷыларын танығлығ ӱлӱкӱннең прай чӱреемнең алғыстапчам. Чуртастарың амыр-иптiг парзын, хазыхтарың пик ползын, палаларың ӧрiндiрзiннер. Чобағлар, хомзыныстар пiстiң хайхастығ республикабыстаң оортах чӧрзiннер. Прай iди полар тiп пик iзенчем, – республиканың пайрамынаң алғыстаан Хызылчардағы опера паза балет театрында тоғынчатхан чир-суғҷыбыс, абахай артист Александра Черпакова.